O vicerreitor de Ferrol e Relación Universidade-Empresa, Luis Barral, presentará mañá, xoves 19 de maio, o I Premio ao Espírito Emprendedor UDC, que terá lugar no salón de graos da Facultade de Economía e Empresa ás 11:30 horas. Esta convocatoria, impulsada pola Universidade da Coruña e coa colaboración do Ministerio de Educación, ten como obxectivo promover o espírito emprendedor entre os estudantes universitarios a través da concesión de premios ás mellores ideas empresariais. O concurso vai dirixido ao alumnado da Universidade da Coruña que realice estudos de primeiro ou segundo ciclo ou grao. Está dotado con dúas achegas de 2.500 euros para os dous mellores plans de empresa.

A presentación farase no marco da xornada “Emprende desde a túa universidade” que contará previamente, de 10:30 a 11:30 cun obradoiro-almorzo cos responsables de empresas aloxadas no Viveiro da UDC, como son Goovent e Galebook. Posteriormente á presentación do premio, ás 11:45 horas, Rafael García Rodríguez, catedrático da Facultade de Economía e Empresa, falará sobre a importancia do plan de empresa.

Ás 12:30 horas, intervirá Inger Berggren, presidenta do Banco Mundial da Muller, quen pronunciará a conferencia Crea a túa propia empresa, que presentará Anxo Calvo Silvosa, decano da Facultade de Economía e Empresa. Con respecto ao Premio ao Espírito Emprendedor, o prazo de presentación de proxectos comeza o 20 de maio e permanecerá aberto ata o 3 de xuño de 2011. Poden consultarse as bases na páxina web da UDC: www.udc.es.

O resultado darase a coñecer aproximadamente unha semana despois do remate do prazo de presentación dos proxectos e publicarase nos taboleiros de anuncios e na web da UDC. O xurado valorará aspectos como o carácter innovador do proxecto, o seu nivel de desenvolvemento e a súa viabilidade; a empregabilidade orientada á xestión da diversidade, o potencial de creación de emprego, o potencial internacional, a sustentabilidade do proxecto deseñado, o nivel de implicación real dos emprendedores ou a responsabilidade social do proxecto.

Fonte: http://www.udc.es