O Laboratorio de Radiofísica da RIAIDT participa xunto con outros sete socios nun proxecto internacional para o desenvolvemento de memorias non volátiles para o sector espacial. A investigación acaba de recibir máis dun millón de euros de financiamento da Unión Europea, dos que o 10 por cento será xestionado pola USC.

O proxecto Skyflash realízase con algunhas das instalacións líderes en Europa no test de compoñentes do sector aeroespacial (i.e. Jyväskylä, Finlandia) e da produción de compoñentes electrónicos como Tower Semiconductor (Israel) ou Red Cat Devices (Italia).

En concreto a plataforma tecnolóxica da RIAIDT encargarase dos test en dose total dos prototipos. A presenza do grupo da USC neste proxecto débese, e así figura na memoria explicativa, á ampla experiencia do grupo que dirixe o profesor Faustino Gómez en test de semicondutores.

Ademais do grupo que en España lidera o profesor da USC Faustino Gómez, forma parte deste proxecto persoal investigador das Universidades de Milán e Pádova (Italia), da finlandesa de Jyväskylä, de Chipre, de Uppsala (Suecia), e as xa mencionadas Tower Semiconductor Ltd e RedCat Devices.

O Laboratorio de Radiofísica.
O Laboratorio de Radiofísica da USC colabora activamente en actividades de I+D do sector aeroespacial dando soporte, entre outros, ao Instituto Nacional de Técnica Aeroespacial, ao Instituto de Astrofísica de Andalucía, ao Centro Nacional de Microelectrónica e ao Instituto Max Planck de exploración do sistema solar (Göttingen).

Ademais, polo laboratorio compostelán pasaron sistemas ou compoñentes para a exploración de Marte (MEIGA-METNET project) ou de cometas (ROSETTA project) que constitúen algúns exemplos das misións máis sobresaíntes da investigación do noso sistema solar.

Fonte: http://xornal.usc.es