Oficina CEER
 15-11-2012
PRESÉNTASE NA USC UN NOVO NÚMERO DA REVISTA OBRADOIRO DE HISTORIA MODERNA, A DE MAIOR IMPACTO CIENTÍFICO EN ESPAÑA NO SEU ÁMBITO

O próximo xoves 15 presentarase na USC o número 21 da revista Obradoiro de Historia Moderna. Será ás 13.00 horas no salón de actos da Facultade de Filosofía nun acto no que interveñen a directora da publicación, María del Carmen Saavedra, o secretario da mesma, Isidro Dubert, e o director do Servizo de Publicacións da USC, Juan Blanco.

Obradoiro de Historia Moderna é a revista de maior impacto científico en España no ámbito da Historia Moderna segundo o índice RESH e a segunda nas áreas de Historia Moderna e Contemporánea. A publicación ve a luz baixo o selo de calidade ‘USC, editora’.

O número correspondente ao ano 2012 preséntase nunha dobre edición, impresa e dixital, esta última a través do Portal Rev(usc). En liña coa continua actualización na que esta inmersa a revista, os seguintes números serán xa editados en soporte dixital grazas á plataforma OJS da USC. Deste xeito, aspírase a reforzar o proceso de internacionalización da revista iniciado en 2005 e favorecer así o incremento dos seus índices de impacto tras os bos resultados acadados nos últimos años.

O volume 21 que agora se dá a coñecer está formado por un total de 11 traballos de investigación dedicados, entre outros temas, á análise da evolución seguida nos últimos anos polos estudos de historia rural en Francia, dos factores que rodearon a formación das parellas na Italia moderna, das fórmulas de explotación pesqueira no banco canario-sahariano ou das relacións que as cortes de Madrid e Viena mantiveron entre si no curso do século XVII.

Fonte: xornal.usc.es