CEER

Especialistas do Centro Interdisciplinario de Estudos Americanistas Gumersindo Busto (CIEAM) da USC e do Instituto de Estudos Históricos, Antropolóxicos e Arqueolóxicos da Universidade Nacional de El Salvador reúnense esta semana en Compostela para reflexionar sobre a conservación da memoria nas sociedades contemporáneas, e concretamente no Salvador.

Entre os días 6 e 8 de maio no Salón de Actos da Facultade de Filosofía, e coordinado polos profesores da USC Eduardo Rey e Pilar Cagiao, o coloquio será punto de encontro de prestixiosos especialistas que analizarán a historia recente do país americano, que sufriu longas ditaduras militares (1932-1979) que deron pé nos setenta a un conflito socio-político aberto e crecente e que concluíu desde comezos dos oitenta ata 1992 na guerra civil máis importante e sanguenta do continente en todo o século. Destaca neste senso, e entre outros, a participación do ex guerrilleiro Jorge Juarez e de Pablo Benítez, da Universidade de El Salvador, persoa vinculada ao FMLN que acaba de gañar as eleccións.

No II Coloquio Internacional de Estudos Latinoamericanos ‘Conservando a memoria. Historia e política en El Salvador contemporáneo’ analizarase así mesmo como a experiencia sobre memoria histórica desenvolvida nos últimos anos en Galicia pode servir de referencia para outras institucións e ámbitos xeográficos que sufriron procesos traumáticos no seu pasado recente.

Programa
O encontro inaugurarase ás 10:00 horas cunha conferencia do catedrático da USC Lourenzo Fernández Prieto titulada ‘Conservación e esquecemento dos pasados incómodos nas sociedades contemporáneas’. A continuación intervirán Ricardo Argueta, Jorge Juárez e Pablo Benítez nun debate sobre a memoria política recente en El Salvador.

Argueta, que dirixe o Instituto de Estudios Históricos, Arqueolóxicos e Antropológicos da Universidade de El Salvador, é especialista no movemento estudantil salvadoreño no século XX. Pola súa banda, o investigador Pablo Benítez é o coordinador da Cátedra Libre Roque Dalton, un espazo universitario de discusión crítica e debate académico, labor que compaxina coa colaboración en varias revistas culturais. Na mesma liña, Jorge Juárez ten participado en numerosas investigacións sobre a historia de El Salvador, onde militou no FMLN durante o conflito armado.

Rematará a sesión da mañá deste mércores coa intervención de Israel Sanmartín Barros, da Escola de Altos Estudos en Ciencias Sociais de París, sobre historiografía e memoria.

Xa os traballos da memoria centrarán os relatorios de Xurxo Pantaleón, do Proxecto ‘As vítimas, os nomes, as voces e os lugares’ da USC; de Víctor Santidrian, da Fundación 10 de Marzo; de Isaura Varela González, profesora da USC e directora do Proxecto Historga (Historia Oral de Galicia); e de Georgina Hernández, do Museo da Palabra e a Imaxe do Salvador e experta en memoria histórica, antropoloxía visual, identidade, etnicidade e dereitos dos pobos indíxenas.

Os días seguintes desenvolveranse outros relatorios que profundarán no convulso século XX salvadoreño e tentarán reflexionar sobre o presente e futuro do país americano.