A Universidade Sénior da Universidade da Coruña organiza o II Coordinators Meeting, titulado “Our Continent – Our Culture”, sendo a única universidade española que participa neste encontro internacional que traerá á cidade herculina a estudantes sénior de Alemaña, Reino Unido, Italia, Finlandia e Portugal.
O II Coordinators Meeting celebrarase entre os días 17 e 20 de maio no Centro Universitario de Riazor. O día 17 producirase a chegada dos asistentes á Coruña. Ao día seguinte, o reitor da UDC, José María Barja, recibirá os asistentes ás 13:30 horas. As 16:30 tocará aos estudantes expoñer diversos ensaios da súa autoría. O día 19 de maio, os participantes visitarán o Parque Natural “As Fragas do Eume” e pararán para xantar en Betanzos ás 14:00 horas. Máis tarde, ás 16:00 horas, visitarán a vila dos cabaleiros. No serán, rematarán as xornadas e ao día seguinte partirán os participantes cara ao seu lugar de orixe.
Esta actividade enmárcase dentro do Grundtvig (antigo programa Sócrates) e está financiado pola Unión Europea. Participan institucións do ámbito do ensino para adultos de seis estados da UE. Os diferentes grupos discuten sobre temas de identidade, cidadanía e cultura europea, estudan inglés e outras linguas europeas, así como tecnoloxías da información e da comunicación.

Fonte: http://www.udc.es