O científico Ramón y Cajal do Instituto de Medicina Legal da USC, Xulio Maside, colaborou coa Universidade de Edimburgo para a obtención da primeira estima directa da taxa de mutación no xenoma drosophila melanogaster que pertence á mosca do vinagre. A investigación centrouse en contabilizar o número de cambios no código xenético desta mosca que se denominan deletéreos ou negativos.

Os resultados do experimento, expostos no pasado mes de xaneiro na prestixiosa revista Nature, dan a coñecer os mecanismos que regulan as mesmas variacións xenómicas en humanos. Ata o momento, a maior parte dos estudos anteriores traballaban con estimas indirectas e menos precisas coma as filoxenéticas.

Xulio Maside explicou que coñecer con máis precisión a taxa de mutación permite deducir a taxa de evolución dos organismos ao longo da historia, a incidencia das alteracións xenéticas vinculadas con enfermidades hereditarias e explicar por que a maior parte dos organismos complexos teñen un ciclo de vida sexual fronte ao asexual. Neste senso, Maside engade que a reprodución sexual elimina gran parte do número de mutacións deletéreas evitando en cada xeración enfermidades hereditarias.